Nakakuha sang anum ka bulawan nga medalya ang elementary student sang Handumanan Elementary School 2 sa ciudad sang Bacolod sa ginapatigayon nga Western Visayas Regional Athletic Association (WVRAA) Meet 2025.
Sa interview sang Bombo Radyo kay Judy Lou Eno, Teacher 1 sa Handumanan Elementary School 2, si Harmony Anaise Garbanzos ang naga-isahanon nga atleta nga nagikan sa nasambit nga buluthuan.
Siya ang pambato sang probinsya sang Negros Occidental sa gymnastics kun sa diin siya ang nagpanguna sa anum ka category kag nakakuha sang anum ka gold medal.
Ini ang ginalakipan sang category nga Freehand, Rope, Hoop, Ball, IAA kag Team category.
Suno kay Eno, ginsaylo sa aga ang tanan nga klase ni Garbanzos agud maka-ensayo ini sa hapon.
Sa pagpadulong sini sa probinsya sang Antique, siya ang gin-updan kag suportado sang iya ginikanan samtang bangod natapos na ang competition ni Garbanzos, nagpauli na ini kaina sang aga pabalik sa Negros Occidental.
Mensahe ni Eno, sa tanan nga luyag mangin gymnast, indi magduha-duha nga magpasakop sa mga competition kag magsulod sa training bangod madamo pa sang mahimo nga matun-an nga makabulig sa pagdevelop sang kinaiya nga talento.
Samtang, sa ulihi nga datos alas-12:00 kaina sang udto, nagapanguna sa gihapon ang probinsya sang Negros Occidental sa Elementary level nga may 32 gold, 19 silver kag 27 bronze; iloilo nga may 30 gold, 31 silver, 18 bronze; Capiz nga may 5 gold, 7 silver, 12 bronze; ginsundan sang Guimaras Aklan kag Antique.
Sa Secondary Level nalapawan na sang Iloilo ang Negros Occidental.
Ang Iloilo ang may-ara na sang 39 gold, 39 silver, 26 bronze; Negros Occidental nga may 37 ka gold, 25 silver, 23 bronze; Aklan nga may 13 gold, 14 silver, 16 bronze; nga ginasundan naman sang Capiz, Antique kag Guimaras.
