Napatay sa paglaslas sang anay Bagyo Opong sa Vietnam, nagdangat na sa 51

Indi magnubo sa 51 ang numero sang mga nagkalamatay sa Vietnam bangud sa Bagyo Bualoi ukon Opong sang yara pa sa Pilipinas, bangud sa lapnagon nga pagbaha.

14 naman ka mga persona ang missing kag 164 ang pilason.

Madumduman nga nagland fall ang bagyo sa Vietnam sang Lunes matapos ang paglaslas sini sa Pilipinas.

Nagdangat naman sa 15.9 trillion dong ukon kapin P34.9 billion ang ginabanta nga halit bangud sa Bagyo Bualoi.

Apektado diri ang linibo nga mga pamalay, buluthuan, dalanon kag opisina samtang apektado man ang supply sang kuryente sa madamo nga lugar.

Ginabanta 230,000 ka mga pamalay sa Vietnam ang naapektuhan kag halos 89,000 hectares sang mga humay kag pananom ang nagkalaguba bangud sa Bagyo Bualoi.