Nagapati ang National President sang Transport Group nga PISTON nga Land Transportation Franchising and Regulatory Board (LTFRB) kag Department of Transportation (DOTr) ang nagdihon sang pagpatigayon sang Unity Walk kahapon, kag nakig-angot na lamang sa mga chairman sang mga kooperatiba kag korporasyon sang Modernized Jeepneys.
Madumduman nga nagpatigayon sang nationwide Unity Walk ang sektor sang modernized jeepney kahapon agud pamatukan ang Senate resolution nga ginpadala kay President Ferdinand ‘Bongbong’ Marcos Jr. nga nagapanawagan sa pagsuspend sang implementasyon sang Public Utility Vehicle Modernization Program.
Sa interview sang Bombo Radyo Bacolod kay PISTON National President Modesto ‘Mody’ Floranda, ginapaaway lamang ang mga traditional kag modernized jeepney drivers kag operators, apang sa kamatuoran ang consolidated kag indi consolidated ang parehas lamang nga biktima.
Pamatuod nga DOTr kag LTFRB ang nagpanguna sa Unity Walk ang paghatag sang speech ni LTFRB Chairman Atty. Teofilo Guadiz III nga nanindugan nga indi nila kilalahon ang Senate Resolution 1096 nga pirmado sang 22 gikan sa 23 ka Senador.
Suno kay Floranda, ginpanindugan ni Guadiz nga sila ang magasunod lamang kay Presidente Marcos, nga nagapakita nga wala nila ginarespeto ang posisyon sang mga Senador.
Hangkat sini kay Marcos nga pamatian ang panawagan sang mga elected officials sangsa mga appointed officials.
Pahanumdom ni Floranda nga ang mga Senador ang ginpili sang tawo kag sila ang nagatrabaho man para sa kaayuhan sang mga pumuluyo.
Suno diri sa madamo na sang mga biktima nga nagsulod sa kooperatiba kag korporasyon sa Bacolod City kag Iloilo nga ginpangsipa sang management kag ginkasuhan. Samtang, padayun ang panawagan sang Transport Group nga PISTON nga dapat mas paboran ang mga local manufacturers sang Public Utility Vehicle para sa PUV Modernization Program sangsa mga foreign companies.
Sa interview sang Bombo Radyo Bacolod kay PISTON National President Modesto ‘Mody’ Floranda, ginakwestyon nila kun ngaa tuman ang pagpabor sang gobyerno sa mga foreign business kag ginapatay ang local nga industriya sa Pilipinas.
Nagapati ini nga kun gustuhon sang gobyerno, sarang gid nga suportahan ang mga local manufacturers sang public tranportation.
Nahibaluan nga madamo na sang mga local manufacturers nga nagpagwa sang model sang traditional jeepney nga ginrehabilitate agud makapasar sa standard sang PUV Modernization.
Ini ang mas barato pa kun ipaanggid sa mga modernized jeepneys gikan sa mga foreign companies nga gina-offer.
Paathag ni Floranda nga ang tinutuyo lamang sang PUV Modernization Program, amo ang masunod ang Clean Air Act, nga matuman man sa pagrehabilitate sang traditional jeepney units.
Pahayag sini nga wala gid gintun-an sang gobyerno ang pagpatuman sang programa kalakip na ang pag-endorso sang Electric Jeepneys.
Suno diri, indi mapaanggid sa iban nga pungsod ang transportation sector ang Pilipinas, bangod sila ang may disposal sang guba nga battery.
Sa pihak nga bahin, sa pagtuon, natumod naman nga maguba ang duta kag kadagatan kun diri ipanglubong ang mga guba nga mga battery.
Suno diri sa programa nga wala maayo natun-an, ang naga-antos amo ang mga drivers kag operators sang pampubliko nga transportasyon.
Isa pa sa nakita sini nga kapalpakal sang Land Transportation Franchising and Regulatory Board (LTFRB) ang pagdula sang 5-year franchise subong man pag-untat sang pag-issue sang provisional authority nga suportado sang layi, agud lamang mapadalian ang pagpatuman sang PUV Modernization Program.
Dugang pa sini nga dapat amat-amat sa kada routa ang pagpatuman sang programa kag indi nationwide nga ginpatuman.
