BACOLOD CITY — Nagapanguna gihapon ang Negros Occidental sa mga probinsya sa Western Visayas nga may pinakamadamo nga kaso sang leptospirosis kag may pinakamadamo man nga numero sang patay bangud sang amo nga balatian subong nga tuig.
Ini ang santo sa monitoring sang Department of Health Region 6 humalin sang Enero 1 tubtub Hulyo 21, 2018.
Sa interview sang Bombo Radyo Bacolod kay Dr. Rosemarie Lamirez, medical coordinator for emerging and re-emerging infectious diseases sang DOH Region 6, ginpahayag sini nga may yara sang 93 ka mga leptospirosis cases sa Negros Occidental kag napulo ang patay.
Sa Bacolod City, 13 ka mga kaso ang narekord kag isa ang patay.
Sa bilog nga Western Visayas, may yara sang 262 ka mga kaso sang leptospirosis kag 34 ang patay.
Magluwas sa Negros Occidental kag Bacolod City, may yara sang 66 ka kaso sa Iloilo Province, 36 sa Capiz, 27 sa Guimaras, 19 sa Iloilo City, apat sa Antique, tatlo sa Aklan kag isa ka indi taga-rehiyon apang natabuan nga diri niya nakuha ang balatian.
Ang iban nga nagkalamatay ang ginalakipan sang isa sa Aklan, walo sa Capiz, tatlo sa Guimaras, pito sa Iloilo Province kag apat sa Iloilo City.
Suno kay Lamirez, kalabanan nga nagaangkon sang leptospirosis ang mga nagaedad lima tubtub 76.
