Nagpatigayon sang New Year’s Call si P/Lt. John Paul Tabujara upod kay Murcia Mayor Jerry Rojas agud hambalan ang ila nangin accomplishment sa mga operasyon sang 2020.
Sa interview sang Bombo Radyo Bacolod kay Tabujara, hepe sang Murcia Municipal Police Station, ginpahayag sini nga pila sa ila mga naistoryahan sang alkalde amo ang pagnubo sang crime rate sang 2020 kun ipaanggid sang 2019.
Suno sa hepe, 80% ang gin-nubo sang crime rate sa ila nga banwa sang nagligad nga tuig.
Lakip man sa ila naistoryahan amo ang pagpakig-away batok sa COVID-19.
Sa karon may yara sang apat ka mga aktibo nga kaso sang coronavirus sa Murcia.
Suno sa hepe, ila nga tinguhaan nga mapabilin sa single digit ang kaso paagi sa pagbuligay sang local government unit (LGU) kag inter-agency task force (IATF).
Samtang, ginkumpirmar naman ni Tabujara nga may 16 ka mga jeep nga nagabiyahe Bacolod-Mambukal nga gin-apprehend bangud nga nagapasakay sila sang 100% sang ila nga seating capacity.
Liwat naman nga nagapangayo sang kooperasyon si Tabujara sa publiko nga magsunod sa ginapatuman nga strict health protocol agud nga mapunggan ang paglapta sang coronavirus.
