Patay ang anay Overseas Filipino Worker matapos nga ginbuno sang iya live-in partner sa Purok Rizal, Brgy Talaban, ciudad sang Himamaylan sang Biyernes.
Ang biktima ang ginkilala nga si Rose Ann Gahito, 29 anyos, samtang ang suspetsado naman amo si Jay-R Dela Rosa, 32 anyos, lunsay mga residente sang nasambit nga lugar.
Sa interview sang Bombo Radyo kay PLt Col Anthony Grande, hepe sang Himamaylan City Police Station, Hulyo 6 sang nagpauli gikan sa luwas sang pungsod si Gahito apang wala ini nagpauli sa ila nga balay.
Nag-atubangay sa Barangay ang magka-live in para sturyahan ang pag-atipan sa ila tatlo ka bata.
Nakasugtan nga ang pinakamagulang ang maga-upod sa amay samtang ang duha naman ang maga-upod sa iloy.
Nagpauli si Gahito sa ila nga balay para kuhaon ang ila mga gamit apang ini ang hinali lang nga ginbuno ni Dela Rosa.
Nag-agom sang apat ka igo sang pagpamuno si Gahito, isa sa tiyan, isa sa liog kag duha sa idalum sang dughan.
Nahimo pa sang biktima nga magsinggit para mangayo sang bulig kag amo man nga may naglabay kag nakabati kag amo nga naka-witness sa natabo.
Boluntaryo naman nga nagsungka si Dela Rosa sa kapulisan kag ini ang magapangatubang sang nagakaigo nga kaso.
Samtang, na-file na ang kaso nga murder sa suspek nga si Jay-R Dela Rosa, 32 anyos, nga nagbuno sa live-in partner sini nga si Rose Ann Gahito, 29 anyos, sa Purok Rizal, Brgy Talaban, ciudad sang Himamaylan sang Biyernes.
Sa interview sang Bombo Radyo kay PLt Col Anthony Grande, hepe sang Himamaylan City Police Station, may yara na nga daan sang indi pag-intindihanay ang duha antes pa man nga nagpauli si Gahito sang Hulyo 6.
Suno kay Grande, nagpahayag si Dela Rosa nga wala na nagahatag sang sustento ang iya nga asawa sa ila mga kabataan.
Kag luyag lamang sang amay nga maka-upod ang iya mga bata.
Samtang, bangod nga yara man mismo ang mga kabataan sa sulod sang balay kun diin natabo ang insidente sila ang sa karun yara sa kustodiya sang Women and Children Protection Desk (WCPD).
