BACOLOD CITY-Magapa-in sang P10 million nga pondo ang ciudad sang Bacolod para sa kampanya batok sa 2019 novel coronavirus virus acute respiratory disease (NCOV-ARD).
Suno kay Executive Assistant to the Mayor Joemarie Vargas, cluster head sang City Disaster Risk Reduction and Management Council, nagpasar sila sang resolusyon nga magapa-in ang ciudad sang pondo nagikan sa emergency fund sang CDRRMO para sa prevention and control sang coronavirus sa ciudad.
Ang nasambit nga resolusyon ang natalana nga paga-aprubahan sa session sang Sangguniang Panlungsod sang Bacolod subong nga adlaw.
Samtang, suno kay Vice Mayor El Cid Familiaran nga chairman sang inter-agency task force against nCoV, indi na madayon ang pagbakal sang ciudad sang mga face masks nga ipanagtag kuntani sa pumuluyo bangud useless lamang ini kun indi manlang ma mintinar.
Sa baylo, gamiton na lang ang pondo sa pagbakal sang mga personal protective equipment para sa medical team.
Natalana man nga i-train sang mga trained personnel sang Regional Hospital ang mga city health officers subong man ang mga personnel sang CDRRMO kag ang taga-Red Cross.
Sa karon, ginapanindugan sa gihapon sang bise alkalde nga may yara sang tatlo ka mga persons under investigation(PUIs) sa ciudad nga ginalakipan sang Canadian national nga lalaki nga may travel history sa Taiwan kag 12-anyos nga lalaki nga Negrense nga nakapadulong sang damlag lang sa Hong Kong kag Macau kag nagdugang diri kahapon, ang 58-anyos nga babaye nga may travel hisory sa Hong Kong baliskad sa record sang probinsya nga may duha lamang.
