Ginkumpirmar sang cluster head sang Bacolod City Disaster Risk Reduction and Management Office (CDRRMO) nga nahatag na kahapon ang P3.5 million nga cash assistance sa tatlo ka ciudad kag isa ka banwa nga naapektuhan sang pagbaha sa 3rd district.
Sa interview sang Bombo Radyo Bacolod kay Joemarie Vargas, cluster head sang CDRRMO, ginpahayag sini nga siya ang nagtiglawas kay Mayor Evelio “Bing” Leonardia sa paghatag sang cash assistance sa nasambit nga mga local government units (LGUs) bangud sa kasakuon man sang alkalde.
Si Talisay City administrator Jonathan Ealdama ang nagbation sang P1 million para sa ciudad sang Talisay; mismo si Mayor Mark Golez naman ang nagbaton sang P1 million man para sa ciudad sang Silay; si Mayor Wantan Palanca naman ang nagbaton sang P1 million para sa ciudad sang Victorias; kag si Mayor Marvin Malacon naman ang nagbaton sang P500,000 para sa banwa sang EB Magalona.
Suno kay Vargas, ang pondo ang pagagamiton sang mga LGU para sa pagpakaayo sang mga naguba nga balay, taytay ukon ano man nga imprastraktura.
Ginmanduan naman sini ang mga nasambit nga LGU nga magpasa sang report angot sa kun paano gin-utilize ang kwarta.
Madumduman nga nag-apelar si Leonardia sa Bacolod CDRRMC nga mag-alokar sang pondo sa amo nga mga LGUs.
