Aminado ang operator sang Weesam Express nga dako ang ila nga kapierdihan kag ang kwarta nga madula sa ekonomiya kun mapatuman naman sang travel moratorium sa tunga sang Negros Island kag Panay sa karon nga ginpaidalom sa modified enhanced community quarantine ang ciudad sang Iloilo.
Hunyo 1 sang aga nga wala pa sang storm signal sa northern Negros Occidental, ginkompirmar sang operator sang Weesam Express nga si Frank Carbon nga padayun ang ila nga biyahe padulong sa Iloilo vice versa matapos nga ginbatak sang Regional Inter Agency Task Force (RIATF) ang temporary suspension sa sea travel sa Iloilo City kag Dumangas port.
Suno kay Carbon, magapadayon ang ila nga biyahe magluwas nalang kun mapagwa sang suspension order ang Coast Guard bilang pagsunod sa mandu sang regional inter-agency tack force.
Aminado ini nga wala sila nagakabalaka sa losses sang shipping companies bangud mas ginakabalak-an ang madulaan sang ginabutang nga pagkaon sa lamesa kag bangud sini magataas naman ang krimen sa syudad.
Ginalantaw ni Carbon nga magataas naman ang krimen bangud kun gutom ang tawo, indi na ini makapaminsar sang maayo.
Ginabanta nga P5 million kada adlaw ang mapierde sang shipping lines sa tion nga wala sang biyahe.
Ginpangabay man sini nga kun may yara man sang pagpauntat sang biyahe, mahatag ang Inter Agency Task Force ukon ang iban nga ahensya sang gobyerno sang temprano nga abiso agud makapreparar ang mga tawo antes pa ini ipatuman.
