BACOLOD CITY — Ginpaambit sang nagapungko sa karon nga executive assistant sang commanding general sang Philippine Army nga si Major General Rolando Joselito Bautista kun paano ini ginbansagan nga Basilan soldier-trailblazer.
Sa interview sang Bombo Radyo kay Lieutenant Col. Elmer Suderio sang Santa Barbara, Iloilo, ginpahayag sini nga naassign siya sa nagkalain-lain nga bahin sang Mindanao antes nadestino sa Basilan kun sa diin Abu Sayyaf Group ang masami nila nga kasumpong.
Tuig 1997 tubtub 2000, nagserbe si Suderio bilang company commander kag una sini nga naengkwentro amo si Isnilon Hapilon nga amo ang nagpasimuno sang Marawi siege.
Agud mapasanyog ang relasyon sang militar kag sang mga sibilyan, naglunsyar si Suderio sang Kapusa Outreach Program.
Nahibaluan nga kuring ang simbolo sang Scout Rangers.
Sang dalayon suno sa suldado, nakuha nila ang simpatiya sang komunidad kun sa diin nagapanugid ang mga ini sang presensya sang kontra bisan indi mamangkot ang militar.
Nahisayran nga isa sa mga rason sang mga pumuluyo sa pagtago sa mga terorista amo ang dumtanay, wala sang presensya sang militar sa ila lugar ukon himata mismo nila ang mga ini.
Bangud sang amo nga programa, ginkilala ang battalion ni Suderio bilang Best Scout Ranger Battalion sang tuig 2016.