Gincongratulate ni former Senate President Juan Miguel “Migz” Zubiri ang Negros Occidental, Negros Oriental kag Siquijor sa pagpirma ni President Ferdinand “Bong bong” Marcos Jr. sa Negros Island Region Act.
Madumduman nga si Zubiri ang nagaserbe nga author sang hagna, kun sa diin ginpasalamatan gid sini ang Presidente nga ginsabat na ang madugay nga handom.
Sa ginpagwa sini nga mensahe sa social media, nagapati ini nga ang pagtukod sang Negros Island Region ang magadala sang dugang nga investors sa isla, nga magaresulta sang pag-umwad sang ekonomiya.
Suno diri handom nila nga mas mapalapit ang gobyerno sa tawo, kag ang pagpirma sa Negros Island Region Act ang katumanan na sang nasambitan nga handom.
Ginpasalamatan man sini si Senator JV Ejercito nga nagserbe nga sponsor sang hagna sa Senado kag ang tanan nga mga kongresista sa Negros Occidental, Negros Oriental kag Siquijor nga naghugpong agud mahatagan katumanan ang handom nga Negros Island Region.
Nagalaom si Zubiri nga ini ang makabulig sa pagbangon sang mga pumuluyo sa kapigaduhon.
