Wala pa nakabalik sa Cadiz City Police Station ang pamilya sang biktima sa aksidente nga nagluntad sa National Highway sang Purok Bouguinvilla, Barangay Caduha-an, Cadiz City kahapon sang aga agud nga magparecord matapos gina-alegar nga kulang ang nabalik nga gamit sang napatay nga biktima.
Madumduman nga nadulaan sang kabuhi si Jenelyn Amante, 37 anyos, residente sang Cadiz Heights Subdivision, Barangay Tinampa-an, Cadiz City sang makabunggo ang ginamaneho sini nga Hyundai Accent nga awto sa Fuso Truck nga ginamaneho ni Freddie Mariquit Jr., 39 anyos, residente sang Relocation, Barangay 21, Victorias City, Negros Occidental.
Si Amante ang may anom ka sakay nga ginalakipan sang lima ka menor de edad kag isa ka senior citizen nga lunsay gindala man sa ospital para sa pagpabulong.
Kasunod sini, naglapta sa social media ang isa ka litrato nga nagapakita sang isa ka personnel sang Cadiz City Disaster Risk Reduction and Management Office nga nagdaho sang gamit.
Una na nga ginpanginwala sang Cadiz CDRRMO ang akusasyon kag nag-athag nga ang personnel ang una nga nakaabot sa lugar agud magbulig kag amo ang nagtawag sang rescue samtang gindaho naman sa iya ang mga pagkabutang.
Sa interview sang Bombo Radyo Bacolod kay Police Lt. Lovella Cordova, deputy chief of police sang Cadiz City Police Station, ginturn-over nila ang isa ka wallet kag mga alahas apang wala man sila nakahibalo kun ano gid ang orihinal nga pagkabutang sang mga biktima.
Apang nakita man nila ang post sa social media nga may isa ka wallet nga gina-alegar wala nauli, apang sa karun wala pa makabalik sa ila estasyon ang pamilya agud iparecord ang alegasyon.
