Desidido ang pamilya sang 18 anyos nga lalaki nga gin-alegar ginhimuslan sang miyembro sang lesbian, gay, bisexual, transgender, queer, intersex, and asexual (LGBTQIA+) nga magpasaka sang kaso batok sa suspetsado.
Sa interview sang Bombo Radyo kay alyas Tino, magulang sang biktima, ginselebrar ang kaadlawan sang ila pakaisa sa ila balay sang Huwebes.
Suno diri, isa sa bisita amo ang suspek nga nag-upod sa pag-inom inom.
Una na nga naglisensya ang suspek nga magpauli sa ciudad sang Sagay apang liwat ini nga nagbalik kag nagtinir.
Alas- 3:00 sang kaagahon pagkasunod nga adlaw, nagsaka sa kwarto ang biktima para magtulog apang nakabugtaw ini kapin alas- 5:30 sang kaagahon kag nakibot nga nakita sini ang suspek nga nagatongtong sa iya.
Wala na sang pang-idalum nga panapton ang biktima samtang yara sa baba sang suspek ang iya kinatawo.
Nagsinggit ang biktima kag nagpanugid kun ano ang natabo.
Nagpangayo naman sang pasaylo ang suspek apang ginpapalakat na lang ini bangod suno kay Tino, indi sila makapasalig kun ano ang mahimo nila sa suspek.
Desidido sa karun ang pamilya sang 18 anyos nga lalaki nga pasakaan sang kaso nga rape by sexual assault ang suspetsado.
