Patay ang isa ka 19-anyos nga lalaki matapos makabunggo ang ginamaneho sini nga motorsiklo sa trailer truck sa National Highway, Hacienda Bariw, Barangay Sta. Teresa, Manapla, Negros Occidental sang alas-1:45 sang hapon, Oktubre 20.
Suno sa imbestigasyon sang Manapla Municipal Police Station (MPS), ang Prime Mover nga truck ang ginamaneho ni alias Reynaldo, 52-anyos, kasado, residente sang Sitio Macabal-ong, Magsaysay, Cadiz City, samtang ang motorsiklo naman ang ginamaneho ni alias Samuel, 19-anyos, residente sang Sitio Sangay, Barangay Purisima, Manapla.
Sa interview sang Bombo Radyo kay Police Major Robelito Mariano, hepe sang Manapla Municipal Police Station, ang truck ang nagabiyahe halin sa Cadiz pakadto sa Manapla kag nagliko pakadto sa Lopez Transloading Compound sang aksidente ini nga nabungguan sang motorsiklo nga magapadulong naman kuntani sa Cadiz.
Suno sa imbestigasyon, madasig ang pagpaladagan ni Samuel sang motorsiklo kun sa diin matapos makabunggo, nagdasok ini sa idalom sang truck.
Bangud sa kakusog sang impact, nakaangkon si Samuel sang pilas sa ulo kag lawas kag ginhingagaw dala sa Northland Hospital, apang gindeklarar nga dead on arrival (DOA) sang attending physician nga si Dr. Sheryl Divina Gracia.
Ang driver sang Prime Mover nga si Reynaldo yara subong sa kustodiya sang Manapla Municipal Police Station para sa nagakaigo nga disposisyon, samtang padayon pa nga ginahibalo sang kapulisan ang kabug-usan nga detalye sang insidente.
