Ginkumpirmar sang iloy sang namissing nga Grade 10 student sa Barangay Sum-ag nga ini ang nasapwan nga nagaka-agnas na nga bangkay sa sulod sang kampo sa Hda. San Roque, Barangay Cubay, La Carlota City.
Madumduman nga si Pearl Joy Galve, 15 anyos, ang namissing sang Hulyo 29, opening of classes, kun sa diin sang aga lang ini nakasulod sa klase apang wala na nagsulod sang hapon, kag bag na lamang sini ang nabilin sa eskwelahan.
Sa interview sang Bombo Radyo Bacolod kay Police Captain Michael Tuburan, station commander sang Bacolod Police Station 9, sang mahibaluan nga may nasapwan nga nagakaagnas nga bangkay sa ciudad sang La Carlota, gilayon nya man ini nga ginpadulungan upod ang iloy, tiya kag pakaisa.
Nakilala ang bangkay bangod sa iya checkered nga puti nga shorts kag puti nga sapatos, samtang indi ma identify ang puti sini nga pang-ibabaw nga panapton.
Ang biktima ang nakit-an sang trabahante sang hacienda sa sulod sang katubuhan kun sa diin ini ang may duct tape nga nakatungtong sa nawong.
Suno kay Tuburan, ginabanta nga masobra na sa isa ka semana nga napatay ang bangkay.
Agud makaseguro sa identity sang bangkay sila ang magapatigayon sang DNA test.
Nagakoordinar man ang mga ini sa imbestigasyon sang La Carlota City Police Station.
Panawagan ni Tuburan sa kun sin-o man nga nakahibalo kun sin-o ang gin-updan sang dalagita antes madula, ang sarang maglab-ot sa ila sa numero 09985987478, kag ginapasalig sang mga ini nga taguon ang identity sang informant.
