Gindul-ong na sa ulihi nga palahuwayan ang 15 anyos nga si Pearl Joy Galve sa Sum-ag Catholic Cemetery, kaina sang aga.
Madumduman nga namissing si Pearl Joy sang Hulyo 29, kag nasapwan nga nagaka-agnas na nga bangkay sang Agosto 14 sa sulod sang kampo sa Hda. San Roque, Barangay Cubay, La Carlota City.
Alas- 9:15 kaina sang aga ginpatigayon ang misa sa St. John Nepomuceno Parish Church.
Makit-an nga lunsay nakasuksok sang itom nga bayo ang pamilya, kakilala, classmates, kag teachers ni Pearl Joy.
Naghatag sang mensahe ang principal sang Sum-ag National High School sa pagpanawagan sang hustisya.
Suno kay Principal IV Dr Warlito Rosareal, ang rally nga ila ginpatigayon ang magaserbe nga panawagan sa Phlillippine National Police, National Bureau of Investigation (NBI) kasubong man kay President Ferdinand ‘Bongbong’ Marcos Jr, nga mapadasig ang imbestigasyon.
Suno kay Rosareal hugot nila nga ginkondena ang natabo nga pagpatay kay Pearl Joy.
Suno diri, una ini nga kahigayunan nga natabo sa nasambit nga buluthuan.
Kaupod sa tanan nga nag-upod sa pagdul-ong kay Pearl Joy sa ulihi sini nga palahuwayan ang panawagan nga magsungka na ang suspek kag atubangon ang sala nga ginhimo sini.
