BACOLOD CITY — Pagatinguhaan sang Yemen National Football Team nga lutuson ang Philippine Azkals sa ila nga sambuwa sa AFC Asian Cup Qualifiers for 2019 nga patigayunon sa Panaad Park and Stadium las-7:30 karon sa gab-i.
Ini ang ginpahayag sang ila nga coach nga si Abraham Mebratu Gebreslassie sa ginpatawag nga press conference para sa hampang karon sa gab-i.
Suno kay Gebreslassie, nagkari sila sa Pilipinas agud magdaog kaangay sang natabo sa ila pag-atubangay sang Azkals para sa World Qualifiers sadtong 2015 kun sa diin ila ginpatumba ang Pinoy players.
Apang aminado ini nga indi lahug-lahog ang ila pagaatubangon nga sambuwa sa football pitch bangud indi manegar nga mabaskog man nga team ang Azkals.
Labaw sa mangin resulta sang hampang, suno kay Gebreslassie, nagalaum ang Team Yemen nga mangin mainit kag maayo ang ila nga pag-atubangay sang Azkals.
Ginpasalamatan naman sini ang mainit nga pagbaton sa ila sang Pilipinas nga kilala sa ginatanyag nga “hospitality” sa mga bisita.
Pagapangibabawon naman sang Philippine Team Azkals ang team work sa ila sambuwa kontra sa Team Yemen para sa AFC Asian Cup Qualifiers for 2019 sa Panaad Park and Stadium karon sa gab-i.
Suno kay Azkals Head Coach Thomas Dooley, mangin mabudlay ang ila pag-atubang sa football team sang pungsod Yemen bangud walo sa ila mga players ang injured.
Apang sa pihak sini, nagapati ang coach nga ila masarangan ang mabudlay nga hampang kun nagabinuligay kag may salig sa isa ang mga players.
Nahibaluan nga kun mag-madinalag-on ang Azkals karon sa gab-i, mangin alagyan ini sa ila pagsulod sa AFC Asian Cup.
Samtang, excited naman ang team captain sang Azkals nga si Phil Younghusband sa ila sambuwa bangud sang mainit nga pagsuporta sang mga football fans sa Bacolod kag Negros Occidental.
Suno kay Phil, nakahampang na sila sa Panaad Park sadto kag iya nakit-an ang puno nga stadium kag nagahinugyaw nga fans.
Aminado man si Phil nga mabudlay kontrahon ang Team Yemen, nga naglutos naman sa ila sadto, apang sa baylo nga magtimalos, ila na lamang himuon ang tanan agud mapyerdi ang mga dumulong.