Ginpahayag sang chairman sang Philippine Red Cross nga aktibo ang mga PRC chapter sa pagresponder sa kahalitan sang Bagyo TINO, partikular na sa Negros Occidental.
Sa interview sang Bombo Radyo Bacolod kay former Senator Richard “Dick” Gordon, sa tanan nga mga kalamidad kaangay sang bagyo, ang PRC ang kalakip gid sang mga nagapanguna sa pagresponder.
Isa sa pinakamapisan nga chapter amo ang yara sa Negros Occidental.
Sila ang may ginpalibot na nga pay loader nga magamit sa paghawan sang mga dalan.
Mga water tankers nga nagadul-ong sang tubig partikular na sa mga evacuation centers.
Ang ila mga personnel kag volunteers ang nagpanghatag man sang food packs, kag may-ara man sang nagalibot sa mga evacuation centers nga ‘Hot on Wheels’ ukon ang food truck nga sarang makapakaon sang 10 mil nga pumuluyo.
Suno kay Gordon, may-ara sag mga volunteers sa nagkalainlain nga mga banwa kag Barangay nga kinahanglan nga ma-activate, agud gilayon nga makapahibalo kun may-ara sang mga area nga nagakinahanglan sang bulig, kag ini ang mapadal-an sang mga kinahanglanon.
Padayun ang pagsuporta sang Philippine Red Cross – Negros Occidental/Bacolod City chapter sa provincial government sa paghatag sang bulig sa mga nahalitan sang paglaslas sang Bagyo TINO.
Sa interview sang Bombo Radyo Bacolod kay Chapter President Rita Benita Mirasol, humalin sang paglaslas sang bagyo, sila ang nagpatigayon na sang humanitarian assistance partikular na sa ila nga mga branches sa Kabankalan, La Carlota, San Carlos kag Silay City.
Sila ang nagasuporta man sa Department of Social Welfare and Development kag Disaster Risk Reduction and Management Office paagi sa pagtukod sang Welfare Assistance Desk, kun sa diin sila ang nagahatag sang referral, may pahampang sa mga kabataan kag nagahatag man sang psychological first aid.
Sila ang nagaprovice man sang free charging station para sa mga cellphones.
Ang iban nga mga PRC branches ang nag-upod man sa mga ginapatigayon nga retrieval operations kag camp managements sang pila ka mga local government units.
Ang PRC ang nagahatag man sang hot meals sa mga evacuation centers kasubong man wound management sa mga mapilasan nga evacuees.
Kahapon sila ang nagpadulong sa banwa sang Moises Padilla, Hinigaran kag Bago City samtang subong nga aga sila ang nagbisita naman sa banwa sang Binalbagan kag iban pa nga bahin sang Southern Negros Occidental.
Ang PRC ang nagprovide man sang hygiene kits kasubong man tubig paagi sa paghamtang sang mga water bladders, bangod madamo sang wala na sang water supply bangod kontaminado sang baha ang ila nga water source.
