Pila ka mga lugar sa kapin 13 ka mga local government units (LGUs) sa Negros Occidental ang ginpaidalom sa hot zones ukon extreme community quarantine.
Suno kay Governor Eugenio Jose Lacson, ginrekomendar sang Provincial Incident Management Team nga ipaidalom sa hot zone ang mga lugar nga may yara sang COVID-19 positive case, ukon isa ka person under investigation (PUI), ukon lima ka mga persons under monitoring (PUMs).
Bangud diri, ang mga lugar nga napaidalom sa hot zone ang ginadumilian na nga maggwa sa ila mga panimalay kag ang LGU na ang magasuplay sang ila mga kinahanglanon lakip na ang mga pagkaon.
Sa press conference nga ginpatigayon kahapon, ginpahayag ni Lacson nga 18 tanan ka mga LGUs ang may yara sang mga lugar nga ginpaidalom sa hot zones.
Apang sa listahan nga ginpagwa sang provincial government, 13 pa lang diri ang nakabutang.
Ini ang ginalakipan sang Bago City nga may 11 ka mga PUIs; Binalbagan ng may tatlo ka PUIs; Cadiz City nga may 7; Calatrava nga may 3; EB Magalona nga may 3; Himamaylan City nga may walo; Hinigaran nga may 12; Isabela nga may isa; Moises Padilla nga may yara sang anom; Pontevedra nga may duha; San Carlos City nga may 18; Toboso nga may isa; kag Valladolid nga may yara sang tatlo ka mga PUIs.
