BACOLOD CITY — Bisan nagdako siya nga wala nakit-an ang iya amay, magamartsa na subong nga aga ang bugal sang Kabankalan City, Negros Occidental nga si Police Cadet Fritz Jhon Vallador bilang valedictorian sang Philippine National Police Academy (PNPA) Class 2018.
Si Vallador ang bata sang isa ka domestic helper sa Marbella,Spain apang nagdako ini sa luyo sang mag-asawa nga Edwin kag Nelia Deocares.
Nahibaluan nga ginbilin si Fritz John sang iya iloy nga si Ana Maria sa iya lola sang una sa ciudad sang Himamaylan sang nagpangita ini sang trabaho sa Manila kag sang nag-edad ini sang 8-anyos ginsapupo ini sang mag-asawa nga Deocares.
Una na nga ginpahayag ni Nelia nga isa palang katuig sang una si Fritz John sang una niya ini nakita bangud nga malapit lang ang boarding house sini sa balay sang lola sang kadete sang nagatrabaho pa ini sa simbahan sang Himamaylan.
Pangisda sa suba ang pangabuhian sang una sang lola kag lola sang kadete kag suno kay Nelia, naga-upod si Fritz John sa suba antes ini mag-eskwela sa aga.
Sang nagpauli si Nelia sa Kabankalan, nagakitaay man sila sang lola sang kadete kag kun kaisa ginadala ini sang iya lola kag diri na kag nangin malapit ini sa bata.
Tubtob nga iya ini ginsapupo sang naga-edad na sang 8-anyos.
Nangin bukas nga libro ang istorya sang kabuhi ni Fritz John sa iya eskwelahan sa Kabankalan kag masami man ini nga nagapanguna sa iya klase.
Bangud nga handom gid sini nga mangin pulis, nagsulod ini sa PNPA sang 2014 kag wala sini ginlauman nga mangin valedictorian.
Wala nakit-an ni Fritz John ang iya amay nga isa ka Chinese, apang sa interview diri, ginpahayag sini nga isa ini sa iya mga inspirasyon sa kabuhi kag nagalaom ini nga kun diin man ang iya amay, kuntani proud ini sa iya nga nalab-ot sa kabuhi.
