BACOLOD CITY — Gilayon nga ginpaalerto sang city director sang Bacolod City Police Office ang tanan nga mga police stations sa ciudad kasunod sang pag-ambush sang ginapatihan New People’s Army sa mga kapulisan sa Guihulngan City, Negros Oriental, Biyernes sang aga.
Ginkasubo ni Police Senior Supt. Jack Wanky ang kamatayon sang anom ka mga miyembro sang Guihulngan City Police Station kalakip na ang ila chief of police nga si Police Supt. Arnel Arpon.
Kasunod sang hitabo, ginpaalerto ni Wanky ang napulo ka police stations sa ciudad bangud sang nagligad pa man ginapatihan nga kun gin-atake sang mga rebelde ang police station sa isla sang Panay, mahimo man nila ini sa Negros kag natabo gid.
Suno kay Wanky, paon lamang sang mga rebelde ang pag-atake sa isa ka persona nga respondehan sang mga pulis agud nga sila ang makatsansa nga i-ambush ang kapulisan.
Ini bangud nakaandan na nga tikang sang mga pulis ang pagresponde sa isa ka hitabo amo gani nga natun-an ini sang mga rebelde.