Aminado ang political analyst nga wala sang Presidente nga makapapas sang illegal nga druga ilabi na kun indi ma-address ang gamot sang problema.
Sa interview sang Bombo Radyo Bacolod kay Atty Jomax Ortiz, mabudlay gid man ang pagtapos sa problema sa illegal nga droga kun sa diin bisan sa former President Rodrigo Duterte nga diri nakatutok kag madamo sang nagluntad nga pinatyanay sang mga durugista, wala gihapon nangin madinalag-on.
Ginapakamaayo naman sini nga sa State of the Nation Address (SONA), gin-anunsyar ni President Ferdinand ‘Bongbong’ Marcos Jr. ang pagban sa Philippine Offshore Gaming Operators (POGOs).
Ginalantaw ni Ortiz ang posibilidad nga sa idalum sang mga gambling activities, ang POGO man ang sa likod sang pagmanufacture ukon pagpasulod sang shabu sa Pilipinas.
Suno diri, wala sang nagakaigo nga equipment sa Pilipinas sa paghimo sang shabu, sa baylo ini ang masami himo sang mga foreign entities.
Ginakilala man sini ang pagpabugal ni Marcos sa accomplishment sini sang anti-illegal drugs campaign, nga ang kinalain sa Duterte Administration, wala sang kaso sang pagkalamatay sang mga drug personalities sa idalom sang mga operatiba.
Nagapati si Ortiz nga magapadayun lamang ang paglibot sang illegal nga droga samtang may kapulisan ukon militar nga nagaserbe protektor kag nagabulig sa illegal drug transactions.
Aminado si Ortiz nga maayo pamatian nga madula ang illegal nga droga pinaagi sa planting of evidence ilabi na kun pat-od naman nga nagaduso ang suspect, apang ang mga ini ang may kinamatarong man bilang tawo.
Nagapati si Ortiz nga bisan si Vice President Sara Duterte ang magpungko nga Presidente indi sini gihapon mapunggan ang pagsulod sang illegal nga droga ilabi na nga archipelago ang Pilipinas kag madamo sang lulutsan.
