Madugangan naman ang kabudlayan sang mga motorista matapos nga subong nga adlaw nagpatuman naman sang oil price hike nga nagmarka sang ikaduha na ka semana para sa gasolina kag diesel apang una nga semana para sa kerosene.
Sa advisory, nagpatuman ang Shell Pilipinas Corporation sang P0.45 nga pagsaka sa kada litro sang gasolina; P0.90 sa kada litro sang diesel; P0.30 sa kada litro sang kerosene.
Pareho man nga price adjustment ang ginpatuman sang Cleanfuel magluwas sa kerosene nga wala sa ila nga produkto.
Alas 6:00 ang takna kaina sang aga nagtake effect ang price adjustment sa mga oil firms magluwas nalang sa Cleanfuel nga nagpatuman sang price adjustment alas 4:00 ang takna kaina sang kaagahon.
Sang tinalikdan nga semana nagpatuman man ang oil firms sang oil price hike nga P1.10 sa kada litro sang gasolina kag P0.20 sa kada litro sang diesel apang wala naman sang pagbag-o sa presyo sang kerosene.
Humalin sang Enero subong nga tuig, nagdangat sa P5.85 nga net increase sa kada litro sang gasolina; P1.95 sa kada litro sang diesel kag net decrease nga P6.35 sa kada litro sang kerosene as of September 24, 2024.
