Ginapanginbulahan sang Police Regional Office 6 ang mga kapulisan sa Negros Occidental matapos naaresto ang fruit vendor nga nakuhaan sang masobra P6.8 million nga balor sang suspected shabu sa drug buybust operation sang Bacolod City Police Office – Drug Enforcement Unit (BCPO-CDEU) sa Purok Kawayan, Brgy. Banago, Bacolod City, Domingo sang gab-i.
Ginatinguhaan sa karun nga mapasaka ang kaso nga paglapas sa RA 9165 ukon Comprehensive Dangerous Drugs Act of 2002 batok sa subject nga si Napoleon Begasa III alyas Toto, 30-anyos, residente sang Barangay Fortune Town, Bacolod City apang nagapuyo sa karun sa Purok Kawayan, Barangay Banago.
Sa interview sang Bombo Radyo kay PRO6 Spokesperson Police Lt. Col. Arnel Solis, ginpanginbulahan ni Regional Director Police Brigadier General Flynn Dongbo ang mga kapulisan sa Negros Occidental sa wala untat nga kampanya batok sa illegal nga druga.
Suno kay Solis, indi ang mga ini mag-untat tubtob matumbok ang mga imbolbado sa illegal nga buluhaton.
Suno sa iya, may mga personalities naman sila nga ginamonitor kag may mga grupo nga naidentify nga may nabilin pa nga miyembro.
Subject for validation pa suno diri ang mga impormasyon nga ginapagwa sang mga suspetsado tuhoy sa ginahalinan sang supply sang druga bangud wala ginadula ang posibilidad nga ginapatalang lamang ang kapulisan.
