Naghimo ang ciudad sang Bacolod sang tikang agud nga makolekta ang mga basura matapos nga makabaton sang madamo nga mga reklamo.
Sa interview sang Bombo Radyo Bacolod kay Bacolod City Mayor Greg Gasataya, kasunod sang nabaton nga madamo nga reklamo bangud sa wala makolekta nga mga basura sa ciudad sang Bacolod nag-instruct ang alkalde sa Bacolod Environment and Natural Resources Office nga malimpyuhan ini.
Suno kay Gasataya, ginkuha sang BENRO kag City Engineers Office ang mga basura kag ginlimpyuhan ang mga merkado nga ginalakipan sang Burgos kag Libertad Public Market.
Nagpadala man si BENRO officer-in-charge Atty. Allyn Luv Zamora-Dignadice sang communication sa IPM-CDC angot sa wala nakolekta nga basura bangud ang ila nga kontrata ang tubtob pa subong nga adlaw.
Gilayon man nga nagsabat ang project manager kag nagpahayag nga nagapangolekta ang garbage hauler.
Mapatuman naman ang ciudad sang penalidad batok sa garbage hauler kasunod sang mga bayolasyon sa kontrata bangud may yara man sang record ang BENRO nga gikan sa checkers.
Samtang nagalaom ang alkalde nga mangin maayo ang performance sang bag-o nga garbage hauler kag collector sa ciudad sang Bacolod.
Natalana nga sa January 1 ipermahan sang alkalde ang notice of award para sa International Solid Waste Integrated Management Specialist Inc. (I-SWIMS) ukon I-SWIMS.
Ang nasambit nga kumpaniya ang madamo naman sang ginaserbisyuhan nga Local Government Units sa Luzon.
Nakasaad sa kontrata ang total clean-up kun sa diin ang volume sang nakolekta nga basura ang basehan gani nagrequire ang ciudad sang 50 brand new compactor trucks.
Indi kaangay sang tinalikdan nga kabug-aton sang nakolekta nga basura ang ginbasehan sang compliance.
