BACOLOD CITY – Ginpadangat na sang Task Force Crusader ang reklamo sa gin-alegar kapabayaan sang medical staff sang Lorenzo D. Zayco District Hospital sa ciudad sang Kabankalan, Negros Occidental nga gintunaan sang kamatayon sang isa ka pito ka tuig nga bata sadtong Disyembre 30.
Suno kay Task Force Crusader National Commander John Chong, matapos ginpadangat sa iya ang reklamo ni Nancy Pajarillo sang Barangay Poblacion 1 Kali, banwa sang Ilog, gilayon ini nagpadala sang komunikasyon sa Department of Health (DOH) ukon sa talatapan ni Sec. Paulyn Ubial kag suno sa iya ihibalo, nabaton na sini ang reklamo sadtong Byernes nga adlaw.
Magluwas sa DOH, ipadangat man ni Chong ang reklamo sa talatapan ni Governor Alfredo Marañon Jr. bangud sa idalom sang superbisyon sang probinsiya ang district hospital kag subong man sa Committee on Health sa Sangguniang Panlalawigan.
Suno kay Chong, dapat nga sabton sng natungdan nga mga doktor kag nurse ang reklamo agud mahatagan sang kasanagan kag subong man hustisya ang natabo sa bata ni Pajarillo nga si a certain Tina.
Una gin-alegar sang iloy nga wala sang doktor nga nag-atipan sa iya anak nga nagpalanuka kag nagpalamus-on bangud ginpahayag wala sang pediatrician sa amo nga hospital.
Napatay si alias Tina sa Corazon Locsin Montelibano Memorial Regional Hospital (CLMMRH) sa Bacolod.
