Ginpahayag sang pila ka mga mamalidha nga indi pormal nga sabat ang ginsumiter nga depensa ni Vice President Sara Duterte sa mga ginapangatubang sini nga impeachment complaints samtang nagapati ang kampo sang Bise Presidente nga indi patas ang pagtratar sang kaso.
Suno kay Batangas Rep. Gerville Luistro, chairperson sang House Committee on Justice, ang ginsumiter nga consolidated verified answer ni Duterte ang wala nagasabat sa mga alegasyon batok sa iya kundi isa lamang ka tikang agud ibasura ang mga reklamo.
Paathag sang mamalidha, bangud indi direkta ang sabat sang bise presidente sa mga isyu, ginakabig ini bilang isa ka general denial.
Gin-ugyonan ini nanday La Union Rep. Paolo Ortega V kag Manila Rep. Joel Chua, nga naghambal nga nagapanago lamang ang bise presidente sa mga teknikalidad.
Samtang sa pihak nga bahin, ginpakigbato sang kampo si VP Sara sa pagpahayag nga may-ara sang double standard sa proseso kun ikumparar sa mga ginfile nga reklamo batok kay Presidente Ferdinand Marcos Jr.
