Alas-5:00 subong nga aga, ang Severe Tropical Storm “ENTENG” ang yara na sa gwa sang Philippine Area of Responsibility samtang ini ang may gamay naman nga pagbaskog.
Ang sentro sang mata sang bagyo ang ulihi nga nasiplatan 265 km West Northwest sang Laoag City, Ilocos Norte.
Dala sini ang kabaskugon sang hangin nga nagadangat sa 100 km/h malapit sa sentro kag pagmadlos nga tubtob 125 km/h.
Ang bagyo ang mahinay nga nagahulag padulong sa West Northwestward nga dereksyon.
Ginbatak naman ang tanan nga Tropical Cyclone Wind Signal sa diin man nga bahin sang pungsod.
Apisar nga yara na sa gwa sang Philippine Area of Responsibility ang Bagyo Enteng, may mga lugar gihapon nga makabatyag sang madamol nga mga pag-ulan partikular na sa Ilocos Norte kag Ilocos Sur.
Mas mataas gihapon ang tyansa sang masami nga mga pag-ulan sa mga matag-as nga area partikular na sa mga nabukid nga lugar gani padayun nga ginapaaligmat sa posibilidad sang mga pagbaha ukon landslide.
Ang Southwest Monsoon ukon Hangin Habagat nga ginpabaskog sang Bagyo Enteng ang magadala man sang kasarangan tubtob sa makusog nga mga pag-ulan sa pila ka bahin sang Luzon tubtob sa masunod nga tatlo ka adlaw.
Subong nga Miyerkules kalakip man sa maapektuhan sang ginpabaskog nga Habagat kita sa Negros Island, kasubong man ang Ilocos Region, Abra, Benguet, Isabela Zambales, Bataan, Aurora, Bulacan, Metro Manila, CALABARZON, MIMAROPA, Bicol Region, Western Visayas, kag Northern Samar.
Ang bagyo Enteng ang padayun nga magahulag sa nakatungdan nga dereksyon tubtob bwas, kag ini ang magaliko sa west northwestward nga dereksyon sa masunod nga inadlaw.
Ini ang ginalantaw nga magalandfall sa vicinity sang southern mainland China sa weekend.
Ini ang ginalantaw nga magabaskog pa kag magasaka sa Typhoon category sa masunod nga mga inoras.
