BACOLOD CITY – Isa sa mga pinakamabakod nga mangin kontra sang Senior League sang Negros Occidental sa Asia Pacific Softball Tournament amo ang Team Guam.
Suno kay Tony Oquindo, ang head coach sang Negros Occidental Senior League, nga amo ang magatiglawas sang Pilipinas sa amo nga torneyo, apat ka teams ang mangin kasumpong sang mga Negrense sa 14 to 16 category nga ginalakipan sang Guam, Indonesia, Singapore kag India.
Apang sa tanan, ang Guam ang pinakamabakod bangud may madugay na ini nga eksperyensiya sa paghampang kag ini ang nangin kampeon sang wala na nagpasakop ang Negros Occidental sa amo nga torneyo.
Suno kay Oquindo, nagpadulong pa sa Domingo Lacson National High School, kun sa diin ini nagatudlo sang softball, ang team Guam agud nga mag-obserbar kun paano maghampang ang mga players sang Negros kag didto nasiling sang mga taga-Guam nga sa pihak nga pigado, maayo maghampang sang softball ang mga Pinoy.
Sa pagbalik sang Negros Occidental, handum kag kumpiyansa man ini nga madugangan ang walo ka mga kampeonato nga nakuha na sang probinsiya sa Asia Pacific Softball Tournament.
Ang Asia Pacific Softball Tournament patigayunon sumugod Hunyo 15 tubtob 18 apang ang Negrense team magapauli sa Hunyo 20.
