Ginkumpirmar sang pakaisa sang asawa ni Eddie Epogon nga tiyo ni Eddie ang 55-anyos nga tricycle driver nga ginpatay sang wala pa makilal-an nga mga suspetsado sa Purok Linya, Barangay Cabug, Bacolod City kagab-i.
Madumduman nga naabtan na lamang sang katapo sang Bacolod Police Station 9 nga nagahamyangon na ang biktima nga ginkilala kay Eduardo Cataraja, 55 anyos sa sulod sang iya nga balay kay madamo sang igo sang bala.
Nakita sang isa ka witness nga ginsulod sang tatlo ka wala makilal-an nga mga persona nga may bitbit nga mga armas-luthang ang balay sang biktima kag nasundan na ini sang mga lupok.
Nakuha gikan sa crime scene ang walo ka fired cartridges sang cal. 45, isa ka fired cartridge sang cal. 5.56, isa ka android cellphone, isa ka keypad cellphone, isa ka brown nga wallet nga naga-unod sang pila ka mga ID kag cash sa balor nga P1,521, isa ka one dallor Australian coin kag isa ka gray nga sling bag.
Gilayon nga nagpalagyo sa wala mahibaluan nga dereksyon ang tatlo ka mga suspetsado.
Suno kay alyas Michelle, doble karon ang kasakit nga ila ginabatyag bangud nga magluwas kay Eddie nga napatay man sa isa ka shoot out matapos gina-alegar nagbato sa mga pulis kadungan sang pagserbe sang warrant of arrest sa iya sa Sitio Manluy-a, San Jose, Sipalay City nagligad nga Pebrero 20, alas-3:00 sang kaagahon.
Suno sa iya, utod sang nanay ni Eddie si Cataraja.
Suno kay P/Lt. Ma. Liberty Indiape, tagpamaba sang Bacolod City Police Office, ginpahayag sini nga padayon pa nila nga ginahibalo ang background sang biktima.
Ginapahayag nga naga-isahanon lang ini sa iya nga balay bangud ang iya asawa ang nagatrabaho.
Sa karon, padayon pa nga ginatumod sang kapulisan ang motibo sa pagpatay kay Cataraja kag ang identity sang mga suspetsado.
Suno naman sa tupad balay sang biktima sang nagahimos na sila nga matulog kuntani, may nabatian nalang sila nga mga linupok.// Mga tatlo ka suspetsado ang ila nakita nga nagalakat lang.
Suno sa iya, mga lima ka tuig na nga naga-istar sa lugar si Cataraja.
May yara ini sang asawa kag apat ka mga kabataan nga lunsay babayi.
Apang ang asawa sini ang nagatinir sa balay sang ila subang sa Barangay Sta. Fe upod ang agot nila nga bata.
