BACOLOD CITY — Padayon pa ang imbestigasyon sang Community Environment and Natural Resources Office ukon CENRO Bago City kag Provincial ENRO sang Negros Occidental tuhoy sa patay nga mga pangolins ukon balintong nga nasapwan nga ginpanghaboy sa reclamation area sa ciudad sang Bacolod.
Sa pag-imbestigar sang Law Enforcement Section sang CENRO Bago City, 15 tanan ka mga pangolins ukon anteaters nga nasulod sa plastic kag sa sako ang ginhaboy sa cocognan sa reclamation area.
Gilayon nga nagkuha sang tissue sang pangolin ang DENR agud nga mapaidalom sa DNA test kag mahibaluan kun sa diin ini naghalin.
Suno kay Forester Philip Lechoncito, head sang Law Enforcement Section sang CENRO Bago City, ila nga imbitaron para sa questioning ang pangalan nga nakabutang sa sako nga amo si Kevin Sy.
Ang pangolin ang endemic ukon makit-an lamang sa Palawan kag indi ini makit-an sa Negros Occidental.
Mahimo suno sa iya nga ginaluto ini samtang may iban naman nga gina-export sa luwas sang pungsod.
