Nangin matawhay ang una nga adlaw sang filing sang Certificate of Candidacy sang mga political aspirants sa ciudad sang Bacolod kahapon.
Sa interview sang Bombo Radyo kay Bacolod City Election Officer Atty. Revo Sorbito, matawhay ang una nga adlaw sang filing sang COC kag una nga nagfile amo si anay Bacolod City Mayor Evelio “Bing” Leonardia kun sa diin siya ang magapapili bilang kongresista sang Lone District sang Bacolod City.
Antes nagpadulong sa opisina sang Liga ng mga Barangay, si Leonardia ang una nga nagtambong sang misa sa San Sebastian Cathedral kaupod ang iya mga supporters.
Napuno naman sang duag nga pula ang simbahan kag ang Bacolod City Public Plaza bangud sa kadamuon sang supporters sang anay alkalde.
Suno kay Sorbito, ang aspirant lamang ang makasaka kag indi ang mga supporters sa Liga ng Barangay Office, kun sa diin gina-akumodar ang mga magafile sang COC, kag ang COMELEC ang naga-umpisa sa pag-akumodar alas 8:00 ang takna sa aga kag magatakop alas 5:00 sang hapon.
Nagpanugyan man ini sa tanan nga mga aspirants nga magfile na sang tagsa nila ka COC sang temprano kag indi na paghulaton ang ulihi nga adlaw sang filing.
Nagpanugyan man ini nga dapat kumpletuhon kag tsekyaron ang mga requirements agud nga mas madasig ang pagproseso sang filing sang COC.
Suno pa diri, ang una nga adlaw sang COC filing ang daw kaangay sang dry run agud nga ma-imprubar ang proseso para sa nabilin nga inadlaw sang COC filing.
