BACOLOD CITY – Hilway nga nakapauli ang nagsungka nga suspetsado sa paghold-up kag paglugos sa isa ka callcenter agent sa ciudad sang Bacolod sang tinalikdan nga Myerkules sang kaagahon.
Nahibaluan nga kahapon, boluntaryo nga nagpadulong sa Bacolod Police Station 7 si Virgilio Villaflor, 42-anyos, residente sang Barangay Minoyan, Murcia, Negros Occidental, agud hugot nga ipanginwala ang krimen nga ginapasibangod sa iya.
Siya ang gintudlo sang biktima nga si alias Lyn, 26-anyos, nga isa sa duha nga naghold-up kag naghimulos sa iya.
Bangud indi tungod sa hot pursuit operation ang paglutaw ni Villaflor kag wala pa sang kaso nga ginpasaka batok sa iya, ginhilway ini sang kapulisan.
Ginpasiguro naman sang hepe sang Police Station 7, Police Chief Insp. Charles Gever, nga gilayon nila ipasaka ang kaso nga Robbery kag Rape batok kay Villaflor kag sa isa pa ka suspetsado sa labing madali nga panahon.
