BACOLOD CITY – Ginpadangat na sa Office of the Ombudsman kag kay Land Transportation Office Assistant Secretary Edgar Galvante ang reklamo tuhoy sa mahinay nga pagpatuman sang LTO Region 6 sa pina nga dapat idagdag sa mga personnel nga naulamid sa korapsyon.
Ini matapos nga isa ka empleyado sang LTO Bacolod ang naghatag sang impormasyon sa Task Force Crusader nga wala pa gihapon ginpatuman ni Director Roland Ramos ang rekomendasyon ni Atty. Gaudioso Geduspan, legal section chief sang LTO 6 kag chairman sang Regional Anti-Fixers team, nga pasakaan sang kaso administratibo ukon iterminate ang mga miyembro sang Enforcement Section nga nagapangwarta sa mga motorista nga ila madakpan.
Ang amo nga modus ang ginahimo pinaagi sa paggamit sang ink nga sarang mapanas agud nga pasakaan ukon pagamayan ang balayran sang violator agud nga may maganar ang empleyado sang LTO.
Indi lamang sa LTO Bacolod ang amo nga alegasyon kundi sa iban pa nga opisina sa Negros Occidental kag sa isla sang Panay.
Suno kay John Chiong, deputy national commander sang Task Force Crusader, sang Enero pa ang amo nga rekomendasyon apang wala man gihapon naaktuhan ni Ramos amo gani nga dapat manabat ini sa mahinay nga paghulag tuhoy sa amo nga kontrobersiya.
