BACOLOD CITY – Pormal na nga gin-dismiss sa serbisyo ang bise alkalde sang banwa sang Valladolid sa probinsya sang Negros Occidental kag pito ka mga empleyado nga ginpa-dismiss sang Office of the Ombudsman.
Sa interview sang Bombo Radyo kay Atty. Anthony Nuyda, concurrent regional director sang DILG Negros Island Region, ginserbe sang provincial office subong nga adlaw ang dismissal order nga ginpapanaog sang Ombudsman sang bulan sang Pebrero batok kay Vice Mayor Romel Yogore na guilty sa kaso nga grave misconduct and dishonesty.
Magluwas sa bise alkalde, gin-dismiss man sa pwesto sanday municipal agriculturist Giovanni Robles kag mga miyembro sang Bids and Awards Committee nga sanday Joseph Alfonso Manayon, Ernesto Genobis, Daisy Galve, Cherryl Aguirre, Merlene Magbanua kag Ramonito Amazona.
Ang nasambit nga kaso ang nag-ugat sa pag-award sang kontrata sadtong tuig 2009 para sa pagpakaayo sang mechanical grain dryers sa isa ka kontraktor nga wala nag-agi sa husto nga bidding kag pagbakal sang binhi sang humay nga wala sang authority nagikan sa Sangguniang Bayan.
Magluwas sa dismissal from service, may yara pa ini sang accessory penalty nga perpetual disqualification from holding public office.
