Nagluntad ang engkwentro sa tunga sang 62nd Infantry Battalion sang Philippine Army kag ginapatihan nga mga miyembro sang makawala nga grupo sa Sitio Matil-e, Barangay Quintin Remo, Moises Padilla, Negros Occidental kaina sang aga, Oktubre 28.
Sa interview sang Bombo Radyo Bacolod kay Lt. Col. Divar Crisostomo, acting commanding officer sang 62nd Infantry Battalion sang Philippine Army, kaina alas 9:00 ang takna sang aga nagluntad ang engkwentro sa tunga sang mga suldado kag miyembro sang Central Negros 1.
Suno kay Crisostomo, ang engkwentro nagluntad matapos nga makabaton sila sang report nagikan sa isa concerned citizen nga may yara sang presensya sang armado nga grupo sa ila nga lugar nga nagapamahog kag nagapang-extort.
Gilayon nga nagpatigayon ang katapo sang 62nd Infantry Battalion sang Philippine Army sang security operations nga nagresulta sa encounter nga naglab-ot sa 10 tubtob 30 mins nga pagbayluhanay sang lupok.
Suno kay Crisostomo wala sang nasamaran sa tropa sang gobyerno apang nagapati ang mga ini nga may nasamaran sa bahin sang kontra bangud may nakita ang mga ini sang blood stains.
Nakita man mismo sang operating forces sang 62nd IB nga may dala nga wounded ang kontra samtang naga-withdraw.
Masobra sa 20 ka mga katapo sang ginapatihan NPA ang naengkwentro sang mga suldado.
May na-report nga nasalabat sang bala nga isa ka anum ka tuig nga bata nga lalaki kag naigo sa ulo.
Ang bata ang yara sa sulod sang balay nga 300 meters ang kalayuon gikan sa encounter site.
Nagapati ang commander sang 62nd IB nga gikan sa kontra ang nakaigo sa bata bangud ang mga suldado ang precise kag ang naigo sang mga ini katapo sang makawala nga grupo kag makita man ini base sa blood stains.
Naghatag naman sang bulig ang mga suldado kag naka-coordinate naman ang mga ini sa Local Government Unit kag Disaster Risk Reduction Management Office sang banwa agud nga maproseso ang bangkay sang bata kag mahatagan sang nagakaigo nga paglubong.
Ang encounter site ang malayo sa residential area apang may yara lamang sang pila ka mga pamalay ang malapit didto.
Padayon pa sa karun ang hot pursuit operation sang tropa sang gobyerno agud nga madakpan ang katapo sang makawala nga grupo.
