BACOLOD CITY — Padayon nga igaduso sang magagmay nga mga manugtanom sang tubo sa Negros Occidental nga mauntat ang importasyon sang high fructose corn syrup nga amo ang ginagamit sang mga softdrink companies bilang pampatam-is sa baylo nga lokal nga kalamay.
Suno kay Wennie Sancho, lead convenor sang Save the Sugar Industry Movement ukon SAVE SIM, indi husto ang nagagwa nga impormasyon nga ang dalagko nga mga planters ang nagabatyag sang epekto sang HFCS kun sa diin naganubo ang bili sang kalamay.
Ini bangud base sa data sang labor sector, 80 tubtub 90 porciento sang mga ginatamnan sang tubo sa Negros Occidental ang ginapanag-iyahan sang mga small planters kag mga benepisyaryo sang agrarian reform program ukon mga kooperatiba.
Pananglitan magpadayon kag maglala ang kaangay nga problema, may iban nga paagi ang dalagko nga mga planters agud nga maka-income kaangay sang pag-convert sini sa mga subdivision.
