Kun may Superman kag Superwoman, may Super Lola man ayhan?
Isa ka 80 anyos nga babayi sa Yekaterinburg, Russia ang ginakabig nga maswerte matapos madagdag sa ika-anum nga panalgan sang apartment kag nagtupa sa nakapark nga salakyan nga wala lang man ini napilasan.
Santo sa report, nagapanglimpyo sang bintana ang babayi apang nadagdag ini halin sa sixth floor kag nagtupa sa salakyan.
Nakuha sa CCTV cameras ang natabo kun sa diin nakita nga matapos magtupa sa salakyan, nanaog lang ang babayi kag naglakat.
Nagpalapit ini sa isa ka tawo kag nangayo sang bulig kag siya ang gilayon nga gindala sa ospital agud masiguro ang iya kondisyon.
Ginkumpirmar naman sang kapulisan nga wala sang foul play apang tubtob sa karun misteryo sa gihapon kun paani ini nakaluwas sa pagkadagdag nga wala lang man sang major injuries ilabi na sa edad sini.
Nakit-an naman nga nagluhob ang atop sang salakyan bangod sa impact.
Suno sa tag-iya sang salakyan, nakita sini nga nagahamyangon ang babayi sa babaw sang iya salakyan kag ginhambalan nga siya naga-istar sa apartment.
Suno sa police spokesperson, santo sa imbestigasyon, nadagdag ang babayi bangod wala ini nagahalong kag ang biktima yara sa karun sa medical center kag ginahatagan sang nagakaigo nga assitance samtang nagapadayon pa ang imbestigasyon sang kapulisan.
