BACOLOD CITY — Pagahingyuon sang business sector kay Presidente Rodrigo Duterte nga indi lang pagsiraduhon ang mga regional offices nga gintukod sa Negros Island Region bisan ginbungkag na ini.
Sa exclusive interview sang Bombo Radyo, ginpahayag ni Edward Du, presidente sang Negros Oriental Chamber of Commerce and Industry ukon NOCCI, nga magahingyo sila nga himuon nalang nga satellite offices sang Region 7 ang mga opisina nga yara sa Dumaguete City kag iya naman sang Region 6 ang yari sa ciudad sang Bacolod.
Paathag ni Du, tuman kadako ang bulig sang mga opisina sa Dumaguete City bangud indi na sila magtabok sa Cebu sa diin nagalawig sang apat ka oras ang biyahe sa tion nga may transaksyon kag indi naman magtabok sa Iloilo ang taga-Negros Occidental.
Paagi man ini suno sa iya agud nga indi madulaan sang trabaho ang mga empleyado sa regional offices.
Isa ka position paper ang igadihon sang NOCCI kag Metro Bacolod Chamber of Commerce and Industry nga ipadala kay Duterte kag sa mga tiglikom sang departamento sang gobyerno agud nga mapalab-ot ang amo nga hingyo.
Nagalaom man ini nga suportahan sang mga local government units ang plano sang business sector.
May suhestiyon man nga indi lang pagbayaan ang regional office sang Department of Education Negros Island Region sa ciudad sang Dumaguete sa Negros Oriental.
Sa exclusive interview sang Bombo Radyo kay DepEd Assistant Secretary Tonisito Umali, ginsuhestiyon ni DepEd NIR assistant regional director Salustiano Jimenez nga himuon nalang nga sub-regional office sang DepEd Region 7 ang opisina sa Dumaguete City.
Apang gin-athag ni Umali nga informal talks pa lamang ini kag iya pa nga ipalab-ot kay DepEd Secretary Leonor Briones agud nga indi na magtabok sa Cebu ang taga-Oriental kun may transaksyon sa regional office.
Suno kay Umali, wala na sang may mahimo ang taga-NIR kundi sundon ang mando sang presidente apang may mga rekomendasyon agud indi mauyang ang structure sa Dumaguete.
Samtang wala naman sang dapat nga kahangaw-an ang mga personnel bangud igabalik lamang sila kun sa diin sila naghalin.
