BACOLOD CITY — May nadihon na nga stratehiya ang mga regional offices sa Negros Island Region agud nga makapadayon sa pagtrabaho ang gin-hire nga job order casuals sa tion nga mabungkag ang rehiyon sa Oktubre 9.
Sa pagpadulong sa Bacolod ni DILG Undersecretary for Local Government Austere Panadero kahapon, ginpahayag sini nga iga-accommodate tubtub sa Disyembre 31 ang mga JOs.
Bangud nga wala na sang regional office diri sa NIR, ang regional director nalang sang Region 6 kag Region 7 ang magakontrata sa nasambit nga mga JOs agud indi sila madulaan sang trabaho.
Ini ang ginalakipan sang Department of Environment and Natural Resources, Department of Agrarian Reform kag Department of Social Welfare and Development nga nag-hire sang JOs agud nga magpatigayon sang ila mga programa.
Magapadayon man suno sa iya ang recruitment sang Philippine National Police apang magadiretso na sa Region 6 kag Region 7 ang processing sang mga gin-hire sang Police Regional Office 18 bangud yara man ang ila pondo.
Sa bahin sang Bureau of Fire Protection suno kay Panadero, magapadayon man ang ginsuguran nga training sa Panaad Park and Stadium diri sa ciudad sang Bacolod.
