BACOLOD CITY — Ginpanindugan sang direktor sang Negros Occidental Police Provincial Office (NOPPO) nga nagdepensa lang ang tropa sang kapulisan nga nakapatay sa miembro sang Barangay Lupon sang Laga-an banwa sang Calatrava kahapon.
Suno kay Police Senior Supt. Rodolfo Castil ginpangapinan lang sang mga miembro sang Special Action Force kag Negros Occidental Police Provincial Mobile Force ang ila mga kaugalingon matapos nga naggabot sang armas ang biktima nga si Bolbet Leyte, 42-anyos sang ini ang napasigahan sang suga sa iya nga payag-payag.
Suno sa provincial director, maayo lang kay wala naglupok ang armas ni Leyte gani nga wala sang napilasan sa tropa sang kapulisan.
Madata ang armado nga grupo kag ‘gun for hire” sa lugar suno kay Catil, nga nagapangilkil sa mga small planters kun sa diin ginasuspetsuhan nga miembro si Leyte.
Magluwas sa armado nga mga grupo may yara man sang “sightings” sang mga New People’s Army (NPA) sa nasambit nga barangay.
Bukas suno sa iya ang Negros Occidental Police Provincial Office (NOPPO) sa patas nga imbestigasyon sa kamatayon sang miembro sang barangay lupon.
Suno kay Castil, kinamatarong naman sang pamilya nga pa-imbestigaran ang pagkapatay sa ila nga himata.
Ginpanindugan man sang NOPPO director nga indi “overkill” ang pagkapatay sang biktima nga amo naman ang gina-alegar sang pamilya sini.
Kasunod sang insidente nagpalab-ot man sang pagpakig-unong si Senior Supt. Castil sa pamilya ni Leyte.
