Narelease na sa ospital ang duha ka mga kapulisan samtang estable naman ang kondisyon sang iban pa matapos madagdag sa pil-as ang pribado nga salakyan sa Purok Tuburan, Barangay Pandanon, Salvador Benedicto kapin alas-3:00 sang hapon sang Sabado.
Madumduman nga walo ang sakay sang salakyan nga ginlakipan sang apat ka pulis kag tatlo ka sibilyan kalakip ang duha ka menor de edad kun sa diin isa ang napatay kag pito ang nasamaran.
Kabahin sa mga biktima sanday Police Corporal Patrick Panganiban, 32 anyos, residente sang Brgy. Alijis, Bacolod City; Police Corporal Jane Claire Batadhay, 29 anyos, residente sang Victorias City; Police Corporal Hazel Motin; Patrolman Calveen Corral; nga lunsay mga katapo sang Bacolod City Police Office.
Sa interview sang Bombo Radyo Bacolod kay Police Major Ryan Villasario, hepe sang Don Salvador Benedicto Municipal Police Station, magluwas sa napatay, estable na ang kondisyon sang mga kaupdanan sini, kag nakagwa naman sa ospital ang duha ka pulis.
Imbestigahan pa sang mga ini kun ano ang rasun sang aksidente.
Wala paman natumod kun sa diin nakapwesto ang biktima nga gindeklarar dead on arrival.
Ginacontact paman sa karun ang tag-iya sang salakyan agud ini ang makuha sa pil-as bangod ang rehistro ang nakapangalan sa lain nga persona.
Sa inisyal, ginpahayag sang mga sakay nga sila ang padulong sa banwa sang Salvador Benedicto.
Samtang ginpanugyan naman sang tagpamaba sang Bacolod City Police Office sa mga biktima nga magpaayo danay.
Sa interview sang Bombo Radyo Bacolod kay BCPO public information officer Police Capt. Ma. Liberty Indiape, minor injuries lamang ang samad sang iban sa mga biktima gani gilayon nga nakapauli kalakip na ang isa ka menor de edad.
Sa latest update, nakagwa naman ang duha ka police personnel.
Sa karun may mag-iloy pa nga nagapabilin sa ospital kun sa diin ang isa ang nagahulat na lamang sa mga result sang tests kag may isa nga may injuries sa tiil kag liog.
Apang pasalig ni Indiape nga maestorya na sang matarong ang tanan nga biktima.
Sa karun wala pa nakapatigayon sang dugang nga mga imbestigasyon bangod ang una nga ginseguro amo ang medical concerns sang mga biktima.
Panawagan na lamang sini sa mga kapulisan nga maghalong sa pagdrive.
Ang apat ka police personnel ang lunsay assigned sa Administrative and Resource Management Department sang BCPO.
