Linibo ang mga tawo nga nagpila sa St Peter’s Basilica sa Rome, Italy sa una nga adlaw sang public viewing ni Pope Francis.
Kahapon, ginsaylo ang bangkay ni Pope Francis nagikan sa Casa Santa Marta padulong sa St. Peter’s Basilica.
Ang public viewing ang magadugay tubtob sa Biyernes kag igalubong naman ang Santo Papa sa Sabado.
Sa interview sang Bombo Radyo Bacolod kay Jeff Vinas Lagos, Bombo International News Correspondent sa Vatican ginpahayag sini nga antes nga makasulod sa St Peter’s Basilica ang mga tawo ang nagalabay sa x-ray.
Suno kay Lagos, ginadumilian nga magdala sang suludlan nga may unod nga madamo nga tubig kasubong man ang mga matalom nga bagay.
Suno diri, wala siya nabudlayan nga makasulod bangud nga naglisensya ini nga magasituationer report para sa Bombo Radyo Philippines kag ginpakita ang facebook page sang network.
Siya ang ginpasulod sa bahin sang St Peter’s Basilica kun sa diin nakapwesto ang mga journalists nga nagikan sa nagkalain-lain nga bahin sang kalibutan.
Sa obserbasyon ni Lagos, mas madamo ang mga tawo nga nagpadulong para sa public viewing sa haya ni Pope Francis kun ipaanggid sa haya ni Pope John Paul II.
Samtang ginpahayag man sini nga isa ang pangalan ni Cardinal Luis Antonio Tagle sa matunog nga masunod nga mangin Santo Papa bangud nga may dako ini nga posisyon sa Vatican kag isa man ini sa mga malapit kay Pope Francis.
