Estable na ang kondisyon sang 29 anyos nga call center agent nga lalaki nga ginpulihan kastigo kag 15 ka beses nga ginbuno sa parking area sang isa ka call center company sa Magsaysay Avenue, Brgy Singcang-Airport, Bacolod City.
Ang biktima ang ginkilala nga si Bret Requieron, 29 anyos, residente sang Purok Sigay, sa nasambitan nga Barangay samtang ang nagbuno pa lamang ang ginhingadlan gikan sa tatlo ka suspetsado nga amo si Ajay Austria, residente sang Deca Homes Subdivision, Brgy Cabug, Bacolod City.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, ginpahayag sang biktima ang ginbantayan sang tatlo ka persona nga makaabot sa parking lot.
Pagpanaog sini sa motorsiklo, siya ang ginlampusan sang botelya sa ulo kag ginpulihan kastigo tubtob ginbuno.
Selos ang ginatudlo nga motibo sa krimen.
Suno kay Cayao, ginahulat nalang nila ang medical result sang biktima agud mapasaka ang kaso nga frustrated murder.
Panawagan naman sang magulang sang biktima sa mga suspect nga magsungka na lamang agud makuha nila ang hustisya sa pagbuno kag kastigo sa iya utod.
Sa interview sang Bombo Radyo Bacolod kay Ritchell Jamelo, anay katrabaho sang iya manghod ang tatlo ka suspect apang nagresign na sa trabaho.
Pahayag sang biktima nga si Ajay ang una nga nanapungol gani napilitan magdepensa sa kaugalingon si Bret.
Sang matumba na si Ajay, didto na kag nag-intra ang duha sini ka kaupod.
Suno kay Jamelo, 15 ka buno ang na-agom ni Bret, ginpilasan man ang iya nga guya halin sa bibig padulung sa dulunggan kag ini ang ginpa-ekis, samtang ginpilasan man ang iya nga agtang.
Makasugilanon naman nila ang iya manghod kag ginatudlo nga selos ang kabangdanan sa krimen.
