Pilason ang isa ka Barangay Tanod matapos maluthangan samtang nagatambag sa away sa Sitio Tap-ok, Barangay Enclaro, Binalbagan, Negros Occidental kahapon sang aga.
Ang biktima ang ginkilala nga si Alyas Eddie, 61 anyos residente sa nasambitan nga lugar.
Sa interview sang Bombo Radyo Bacolod kay Police Major Jun Ray Batadlan, hepe sang Binalbagan Municipal Police Station, ang suspect nga ginkilala nga si Alyas Daryl, 32 anyos, residente sang Barangay Progreso, Binalbagan ang naglabay sa ginakay-o pa lamang nga dalan sa lugar.
Siya ang ginsita sang isa ka tricycle driver, apang bangod na-insulto ini sa pagsaway sa ila, nagluntad ang komosyon.
Nakita naman sang Barangay Tanod ang pagtinapungulay sang duha gani gintinguhaan sini nga matambagan paagi sa paghakos sa suspect.
Bangod sa kaugot, ginhunos ni Daryl ang dala nga cal. 38 revolver, nga tuyo lamang sini kuntani nga gamiton sa pagpamahog.
Apang napitik sini ang gatilyo kag naigo sa likod ang Barangay Tanod.
Gilayon naman nga gindala sa ospital ang biktima, kag yara sa karun sa Corazon Locsin Montelibano Memorial Regional Hospital kag estable na ang kondisyon.
Ang suspect ang nakahunong naman sa Binalbagan Municipal Police Station kag ginahulat na lamang ang desisyon sang biktima kag pamilya sini kun sila ang magapasaka sang kaso.
