Samtang nagadugay nagadamo nagid ang mga nakadiskubrehan sang mga tawo kaangay lamang sa French scientists nga nakadiskubre sang bag-o nga sahi sang dugo sa isa ka babayi gikan sa Caribbean Island sang (gwaa·duh·loop) Guadeloupe.
Ini matapos ang 15 ka tuig halin sang mabaton sang mga researchers ang blood sample nagikan sa isa ka pasyente nga nagpaidalom sa mga routine test antes ang isa ka operasyon.
Suno sa French Blood Establishment (EFS), ang 68 anyos nga babayi ang nagaisahanon nga kilala nga carrier sang bag-o nga blood type nga ginatawag nga Gwada negative (-), nga ginsunod sa ngalan sang iya gindakuan nga isla.
Opisyal naman nga ginkilala sang International Society of Blood Transfusion (ISBT) sang June subong nga tuig natukiban ang EFS sa ika-48 nga blood group system sa kalibutan.
Ginpahayag sang medical biologist nga si Thierry Peyrard, nga nadiskubrehan ang tumalagsahon nga antibody sa pasyente sadtong 2011 apang wala sila makalunsyar sang dugang nga pagtuon bangud sa limitado nga resources.
Suno kay Peyrard, nga tuig 2019 sang masolbar sang mga scientists ang misteryoso nga blood type gamit ang ‘high-throughput DNA sequencing’ nga naga-highlight sang genetic mutation.
Ginpahayag ni Peyrard nga ginsubli sang babayi ang iya pinasahi nga blood type nagikan sa iya mga ginikanan nga may mutated gene kada isa.
Nagalaom sa karon ang mga scientistsnga makakita pa sila sang iban pa nga mga indibidwal nga may Gwada negative (-) blood type.
