3,304 ka mga indibidwal ukon 637 ka pamilya ang yara sa evacuation centers bangod sa pagbaha nga nagluntad sa banwa kag ciudad sa Southern Negros Occidental.
May walo ka Local Government Units nga ginbaha nga may yara sang evacuees nga ginalakipan sang banwa sang Hinobaan sa Brgy Po-ok, Asia, Culipapa kag Bulwangan; banwa sang Cauayan sa Brgy Caliling, Guiljungan, kag Masaling; banwa sang Binalbagan sa Brgy Payao, Bagroy, Marina kag San Jose; banwa sang Isabela sa Brgy 1, 5, 8, Maytubig, Rumirang, Tinongan, kag Guintubhan; ciudad sang Sipalay sa Brgy Mambaroto; ciudad sang Kabankalan sa Brgy Hilamonan; ciudad sang Himamaylan sa Brgy Mambagaton kag Caradio-an; kag banwa sang Ilog sa Brgy 1.
Samtang may iban nga LGUs man nga nabahaan apang wala naman sang evacuees.
May yara sang narekord nga landslide sa Brgy Culipapa, Hinobaan kag sa Brgy Caliling, Cauayan.
Samtang, suspendido naman ang klase subong nga adlaw sa banwa sang Hinobaan, banwa sang Binalbagan, Hinigaran, Calatrava, Isabela, La Castellana, Cauayan, Salvador Benedicto, Valladolid, ciudad sang Talisay, Silay, kag Bago.
Samtang sa probinsya naman sang Siquijor gindeklarar na nga wala sang klase sa tanan nga lebel.
Suno kay Negros Occidental Provincial Disaster Risk Reduction and Management Office head Irene Bel Ploteña, indi pa sa karun mahambal kun pila ka mga balay ang nagkalaguba samtang padayon pa ang pag-evacuate sa mga pumuluyo.
Suno diri, padayon ang ila pagmonitor sa mga LGUs nga naga-eksperyensya sang pagsaka sang tubig kasunod sa pagbubo sang ulan.
