Nagdangat sa masobra sa 130,000 ang numero sang nagparehistro sa kabug-usan nga Negros Island Region sa ginpatigayon nga 10-day voter’s registration para sa Barangay and Sangguniang Kabataan Elections.
Sa interview sang Bombo Radyo Bacolod kay Atty. Lionel Castillano, Director sang Commission on Elections (COMELEC)-Negros Island Region, satisfied ini sa resulta sang ginpatigayon nga registration sa rehiyon.
Suno diri, dako nga porsyento sa mga nagparehistro amo ang mga lamharon nga nahatagan sang kahigayunan nga makapa-register.
Pahayag sini, kun madayon gid man ang piniliay sa Disyembre para sa BSKE, naka-procure naman sila sang paraphernalia nga gamiton sa election kag kun indi man madayon, liwat nga buksan ang voter’s registration nga maga-umpisa sa katapusan nga semana sang Oktubre 2025 tubtob sa Hulyo 2026.
Samtang, 130,378 tanan ang nagparehistro sa kabug-usan nga Negros Island Region- 78, 313 diri ang nagikan sa Negros Occidenal; 47, 648 sa Negros Oriental; kag 4,417 sa Siquijor.
Pahayag ni Castillano, may yara pa sang Election Registration Board (ERB) hearing nga patigayunon sa Agosto 26 kag diri mahibaluan kun maaprubahan ukon indi ang mga application sang mga voter’s registrant.
