Indi anay maghilabot ang Malacañang sa issue sang Senado kag House of Representatives partikular na natuhoy sa maanomaliya nga flood control projects.
Suno kay Executive Secretary Lucas Bersamin, trabaho sang Senado kag Kamara nga imbestigahan ang mga alegasyon ilabi na nga mga “resource persons” pa lamang ang naghambal sa mga imbestigasyon.
Ginpamangkot man ang tiglikom kun nagakahangawa ini sa mga reports sang ghost projects kag mga nauyang nga flood control funds.
Suno diri, natural lamang ang iya pagkahangawa sa issue kaangay sang madamo nga mga Filipino.
Samtang, sa tunga sang ginalantaw nga korapsyon sa flood control projects, ginpanindugan ni Bersamin nga nagapabilin nga mabakod ang gobyerno kag wala man ini sang may nagakakit-an nga pagpamahog.
