Sulod na sa Top 5 sang Galing Pook Awards ang Basurahan to Gulayan sang Barangay 1, Bacolod City.
Sa interview sang Bombo Radyo Bacolod kay Punong Barangay Cesar Rellos, sang Biyernes, gikan sa 15 ka mga kabahin sa Galing Pook Awards contender, ang ‘Basurahan to Gulayan ng Barangay 1’ ang nalakip sa mga nagpabilin matapos ang evaluation.
Ang programa ang ginsuguran sini sang 2018 sa iya nga pagpungko.
Kun sa diin ang 1,000 square meter nga duta nga anay basurahan kag napabay-an ang ginpaconvert sini agud mapuslan.
Ang mga silt ukon makuha nga duta sa idalom sang mga canal kag sapa sa ila nga dredging activities amo ang ila gingamit nga garden soil.
Paathag sini nga kun itampok lamang sa mga creek kag canals ang duta, sa tion sang ulan ini ang maga-ilig lamang pabalik gani mas maayo nga mahakot.
Ginmando naman sini nga sa lugar na ihaboy ang mga panit sang prutas kaangay sang saging kag iban pa, agud mahimo compost.
Luwas sa mga utanon kun sa diin sila ang kumpleto para sa pakbit kag laswa kag iban pa, may mga fruit-bearing plants man ang mga ini kaangay sang grapes, lemons kag mga herbal plants.
Samtang may-ara man sang tilapia pond kag may-ara man sang egg laying.
May mga native chicken man kag road island sa lugar, apang bangod mahal ang feeds, sila ang nagfocus sa tilapia kag egg laying.
Ang ila community garden ang nagabulig sa mga feeding programs sa mga eskwelahan, kasubong man ang mga fisherfolks.
Suno kay Rellos, anom ka bulan lamang makapangisda ang mga fisherfolks kag may anom ka bulan nga off-season, gani ang Basurahan to Gulayan ang maayo nga inisyatibo para sa additional income.
Madamo naman sang nagakadto sa ila gikan sa iban nga Barangay, ciudad ukon banwa para magbench marking.
Kalabanan ang nagakakibot kun paano nga sila ang nakahuman sang sustainable nga community garden apisar nga coastal barangay ang Barangay 1.
Willing man si Rellos nga magpatigayon sang mga seminars sa luyag nga makatuon sang ila paagi, apang pahanumdom sini nga ang inisyatibo ang indi lamang para sa compliance kundi isa ka commitment.
May-ara sila sang nakaschedule para sa pagpaninlo, pagpamunyag kag bisan sa pagtanom sa ila nga community garden agud ini ang mamintinar.
Suno kay Rellos, plano sini magduso sang resolusyon agud bisan sa pagbag-o sang administrasyon, indi matandog kag magapadayun lamang ang programa.
Ginpasalamatan man sini ang mga government officials kag ahensya sang gobyerno, nga nagasugot gilayon sa ila nga mga request partikular na para sa mga farm inputs.
